Old Testament Bible Study Part 1 | பழைய ஏற்பாட்டு ஆய்வு பாகம் ஒன்று 1 | Bible Study in Tamil | Jesus Sam

பழைய ஏற்பாட்டு ஆய்வு (பாகம்–1)

    ஆண்டவரும், மீட்பரும் உலக இரட்சகருமாகிய இயேசு கிறிஸ்துவின் நாமத்தில் உங்களுக்கு என் வாழ்த்துக்களை தெரிவித்துக்கொள்கிறேன்.

       பழைய ஏற்பாட்டில் உள்ள முக்கிய குறிப்புகளை மாத்திரம் இந்த பழைய ஏற்பாட்டு ஆய்வின் மூலமாக நாம் அறிந்துகொள்வோம்.

            பழைய ஏற்பாடு, புதிய ஏற்பாடு என்று நாம் பயன்படுத்துவது அவ்வளவு பொருத்தமான ஒன்று அல்ல.  பழைய ஏற்பாடு பழைய புத்தகமும் அல்ல, புதிய ஏற்பாடு புதிய புத்தகமும் அல்ல.  பழைய, புதிய ஏற்பாடு இவை இரணடும் நமக்கு மிகவும் முக்கியமான ஒன்றாகும்.  நாம் பழைய ஏற்பாடு, புதிய எற்பாடு என்று சொல்வதை விட முந்தின ஏற்பாடு, பிந்தின ஏற்பாடு என்று சொல்லுவதே பொருத்தமானதாகும்.

            எ.கா: ஒரு தொடர்வண்டியை எடுத்துக்கொண்டால் அவற்றில் முதல் பெட்டியில் இயந்திரம் இருக்கும்.  அதைத் தொடர்ந்து ஒவ்வொரு பெட்டிகளும் இணைக்கப்பட்டிருக்கும்.  இந்த பெட்டிகளில் நாம் ஏறி பயணம் செய்கிறோம்.   தொடர்வண்டி நிற்கும் நடைமேடையில் நாம் நிற்கும் போது முதல் பெட்டியாகிய இயந்தியம் இருக்கும் பெட்டி நம்மை கடந்து சென்றுவிடும்.  நமக்கு நேராக இருக்கும் ஏதோ ஒரு பெட்டியில் நாம் ஏறி பயணம் செய்கிறோம்.  நான் ஏறும் முன்பாகவே இயந்திரம் இருக்கும் பெட்டி என்னைக் கடந்து சென்று விட்டதால் அந்த பெட்டி பழைய பெட்டி, அது எனக்கு தேவையில்லை, நான் இப்பொழுது ஏறியிருக்கும் பெட்டி தான் புதிய பெட்டி அதுமாத்திரம் எனக்கு போதும் என்று சொல்வது முட்டாள்தனமாகும்.

கிறிஸ்தவர்களாகிய நாம் தான் அந்த பெட்டி, அதாவது புதிய ஏற்பாடு.  புதிய ஏற்பாட்டில் நாம் இருந்து கொண்டு பழைய ஏற்பாடு தேவையில்லை என்று சொல்லுவது, நான் ஏறி பயணப்பட எனக்கு தொடர்வண்டி பெட்டி வேண்டும், ஆனால் அதை இயக்குகிற இயந்திரம் வேண்டாம் என்று சொல்லுவதற்கு சமமாகும்.

நாம் புதிய ஏற்பாட்டு காலத்தில் வாழ்ந்தாலும் அதை இயக்குகிற இயந்திரமாகிய பழைய ஏற்பாடு இல்லையென்றால் நாம் பயணப்படாமல் அதே இடத்தில் தான் நின்றுகொண்டிருப்போம்.

            இன்று அநேக கிறிஸ்தவர்களும், போதகர்களும் பழைய ஏற்பாடு நமக்கு தேவை இல்லை என்று நம்புகிறார்கள்.   புதிய ஏற்பாடு எந்த அளவிற்கு முக்கியமானதோ, அதே அளவிற்கு பழைய ஏற்பாடும் முக்கியமானது.

தொடர்வண்டியின் இயந்திரம் என்பது யூதர்களைக் குறிக்கிறது, தொடர்வண்டியின் பெட்டியில் அமர்ந்திருக்கிறவர்கள் கிறிஸ்தவர்களாகிய நாம்.  நாம் ஒருபோதும் இயந்திரமாக முடியாது.  அதாவது, நாம் யூதர்களாக முடியாது.

            யூதனாய் இருந்தாலும், புறஜாதியானாய் இருந்தாலும் இயேசு கிறிஸ்துவை ஏற்றுக்கொள்ளாவிட்டால் நாம் பரலோகம் செல்ல முடியாது.  பழைய ஏற்பாடானது புதிய ஏற்பாட்டின் நிழலாய் இருக்கிறது என்று அறிஞர்கள் கருதுகிறார்கள்.  எனவே பழைய ஏற்பாடும் மிகவும் முக்கியமானது. 

யூதர்களின் பழைய ஏற்பாடு:

            பழைய ஏற்பாடு என்பது ஆண்டவர் யூதர்களுக்காக, யூதர்களைக் கொண்டு எழுதிய புத்தகம் ஆகும்.  யூதர்களுக்கு பழைய ஏற்பாடு எப்படிப்பட்ட புத்தகம் என்று ஆராய்ந்தால் மட்டுமே பழைய ஏற்பாட்டின் உண்மையை அறிந்துகொள்ள முடியும்.

            யூதர்களுக்கு பழைய ஏற்பாடு மட்டுமே வேதாகமம்.  அதற்கு அவர்கள் வைத்த பெயர் டனாக்(Tanak).  யூதர்கள் பழைய ஏற்பாட்டை இரண்டு பகுதிகளாக பிரிக்கிறார்கள்.  அவை.  நியாயப்பிரமாண புத்தகம், தீர்க்கதரிசன புத்தகம்.

நியாயப்பிரமாண புத்தகம்:

            நியாயப்பிரமாண புத்தகம் என்றால் சட்டப் புத்தகம்.  நியாயப்பிரமாணம் என்பதன் எபிரெய சொல் டோரா (Dorah).  ஆதியாகமம், யாத்திராகமம், லேவியராகமம், எண்ணாகமம், உபாகமம் இந்த ஐந்து புத்தகங்களும் நியாயப்பிரமாண புத்தகங்கள் ஆகும்.  அநேக ஆண்டுகளாக யூதர்களுக்கு இருந்த வேதாகமம் இந்த ஐந்து ஆகமங்கள் மட்டுமே.  இந்த ஐந்து ஆகமங்களையும் எழுதிய நபர் மோசே.  பின்நாட்களில் தான் யோசுவா, சாமுவேல் போன்ற நபர்கள் எழுதிய புத்தகங்கள் அவர்களுடைய வேதாகமத்தோடு சேர்க்கப்பட்டது.

            யோசுவா புத்தகத்தை எழுதியவர் யோசுவா.

            நியாயாதிபதிகள், ரூத், 1 சாமுவேல், 2 சாமுவேல் புத்தகத்தை எழுதியது தீர்க்கதரிசியாகிய சாமுவேல்.

தீர்க்கதரிசன புத்தகங்கள்:

            முதல் ஐந்து ஆகமங்களை யூதர்கள் டோரா என்று அழைத்தார்கள்.  அதைத் தொடர்ந்து யோசுவா முதல் மல்கியா வரை உள்ள முப்பத்து நான்கு (34) புத்தகங்களையும் யூதர்கள் நெபீன் என்று அழைத்தார்கள்.  நெபீன் என்றால் தீர்க்கதரிசிகள் என்று பொருள்.  யூதர்களைப் பொறுத்தமட்டில் யோசுவா முதல் மல்கியா வரை உள்ள முப்பது நான்கு (34) புத்தகங்களும் தீர்க்கதரிசன புத்தகங்கள் ஆகும்.

            முழு பழைய ஏற்பாட்டிற்கும் யூதர்கள் வைத்த பெயர் டோரா வாஹ் நெபீன்.   இதன் பொருள் நியாயப்பிரமாணங்களும், தீர்க்கதரிசனங்களும் அல்லது நியாயப்பிரமாணமும், தீர்க்கதரிசனமும் என்பதாகும்.  இதையே, புதிய ஏற்பாட்டில் இயேசு கிறிஸ்து ”நியாயப்பிரமாணத்தையானாலும் தீர்க்கதரிசனங்களையானாலும் அழிக்கிறதற்கு வந்தேன் என்று எண்ணிக்கொள்ளாதேயுங்கள்.  அழிக்கிறதற்கு அல்ல, நிறைவேற்றுகிறதற்கே வந்தேன்” என்று கூறுகிறார். (மத்தேயு 5:17).   இதன் பொருள் முழு பழைய ஏற்பாட்டை நான் நிறைவேற்ற வந்தேன் என்று இயேசு கிறிஸ்து கூறுகிறார்.

 

நியாயப்பிரமாணத்தின் பிரதிநிதி மோசே:

            பழைய ஏற்பாட்டிற்கு இரண்டு பிரதிநிதிகள் இருந்தார்கள்.  டோரா என்னப்பட்ட நியாயப்பிரமாணத்திற்கு பிரதிநிதியாக மோசே இருந்தார்.  ஏனென்றால், நியாப்பிரமாண புத்தகம் முழுவதையும் எழுதியர் இந்த மோசேயே.  எனவே, நியாயப்பிரமாண புத்தகத்திற்கு பிரதிநிதியாக மோசேயை நியமித்தார்கள்.

            ஆனால், யோசுவா முதல் மல்கியா வரை உள்ள தீர்க்கதரிசன புத்தகத்திற்கு பிரதிநிதியாக யாரை தேர்வு செய்வது என்பதில் குழப்பம் இருந்தது. தீர்க்கதரிகளை புத்தகங்கள் எழுதிய தீர்க்கதரிசிகள்,  புத்தகம் எழுதாத தீர்க்கதரிசிகள் என்று இரண்டு பகுதிகளாக பிரித்தார்கள்.

புத்தகம் எழுதிய தீர்க்கதரிசிகள்:

            புத்தகம் எழுதிய தீர்க்கதரிசிகள் மொத்தம் பதினாறு (16) பேர் இருந்தார்கள்.  அவர்கள் ஏசாயா, எரேமியா, எசேக்கியேல், தானியேல், ஓசியா, யோவேல், ஆமோஸ், ஒபதியா, யோனா, மீகா, நாகூம், ஆபகூக், செப்பனியா, ஆகாய், சகரியா, மல்கியா.   ஏரேமியா தான் புலம்பல் புத்தகத்தையும் எழுதியவர்.  இவர்கள் அனைவரும் புத்தகம் எழுதிய தீர்க்கதரிசிகள்.

புத்தகம் எழுதாத தீர்க்கதரிசிகள்:

            எலியா, எலிசா, காத், நாத்தான் போன்றவர்கள் புத்தகம் எழுதவில்லை.  காத்தும், நாத்தானும் தாவீதோடு இருந்தவர்கள்.  2 நாளாகமம் 9:29-ல் தீர்க்கதரிசியாகிய நாத்தானின் புத்தகத்தில் என்று வாசிக்கிறோம்.  மேலே குறிப்பிட்டுள்ள பதினாறு தீர்க்கதரிசிகளை தவிர மற்ற தீர்க்கதரிசிகளும் புத்தகம் எழுதினார்கள், ஆனால் அவர்கள் வேதப்புத்தகம் எழுதவில்லை.  இவர்களுக்குத் தான் புத்தகம் எழுதாத தீர்க்கதரிசிகள் என்று பெயர்.

தீர்க்கதரிசன புத்தகத்தின் பிரதிநிதி எலியா:

            இந்த முப்பத்து நான்கு (34) புத்தகங்களுக்கு யாரை பிரதிநிதியாக தேர்வு செய்வது என்ற ஒரு குழப்பம் இருந்தது.  பின்நாட்களில் ஆண்டவருடைய ஆலோசனைப்படி ஏலியாவை தீர்க்கதரிசன புத்தகத்திற்கு பிரதிநிதியாக ஏற்படுத்தினார்கள்.  ஏனென்றால், பழைய ஏற்பாட்டை முழுவதுமாக கற்றுத்தேர்ந்த அநேக வேத அறிஞர்கள் எலியாவைப்போல வல்லமையும், அபிஷேகமும் கொண்ட ஒரு தீர்க்கதரிசி வேறு எவரும் இல்லை என்று கருதுகிறார்கள்.  ஏனென்றால், தீர்க்கதரிசிகள் அனைவருமே மரித்துப்போனார்கள்.  ஆனால் இந்த எலியா மாத்திரம் சுழல்காற்றில் எடுத்துக்கொள்ளப்பட்டார் (2 இராஜாக்கள் 2:11).  அப்படியானால் ஏனோக்கும் கடவுளோடு சஞ்சரித்துக் கொண்டிருக்கையில் காணாமல் போனார் (ஆதியாகமம் 5:24) என்று நாம் யோசிக்கலாம்.  ஏனோக்கு தீர்க்கதரிசிகள் காலத்தில் வாழ்ந்த மனிதன் அல்ல.  ஏனோக்கு நோவாவின் ஜலப்பிரலயத்திற்கு முன்பாகவே வாழ்ந்தவர்.  தீர்க்கதரிசிகள் காலத்தில் மரிக்காத ஒரு தீர்க்கதரிசியாக இந்த எலியா காணப்பட்டார்.  1 இராஜாக்கள் 18:38-ல் வாசிக்கிறோம் எலியா வானத்திலிருந்து அக்கினியை இறக்கி இஸ்ரவேலர்களுக்கு இஸ்ரவேலின் யெகோவா கடவுளே உண்மையுள்ளவர் என்று நிரூபித்தார்.   யோசுவா முதல் மல்கியா வரை உள்ள அனைத்து தீர்க்கதரிசிகளையும் நாம் ஒன்றினைத்தால், சரியாக நடுப்பகுதியில் வருகிறவர் இந்த எலியா தீர்க்கதரிசி.  இவைகளைக் கணக்கிட்ட அறிஞர்கள் தீர்க்கதரிசன புத்தகங்களுக்கு எலியாவை பிரதிநிதியாக ஏற்படுத்தினார்கள்.

            மோசேயும், எலியாவும் சேர்ந்து வரும் நேரங்களில் அவர்கள் முழு பழைய ஏற்பாட்டையும் பிரதிநிதித்துவப்படுத்துகிறார்கள் என்று அர்த்தம்.

புதிய ஏற்பாடு:

            புதிய ஏற்பாட்டை ஏற்படுத்தியவர் நம்முடைய ஆண்டவராகிய இயேசு கிறிஸ்து.  எப்போது ஏற்படுத்துகிறார் என்றால், சீஷர்களோடு கடைசி விருந்து அனுசரிக்கும்போது, அப்பத்தை எடுத்து அதை ஆசீர்வதித்து சீஷர்களுக்குக் கொடுக்கிறார்.  அதன்பின்பு பாத்திரத்தை எடுத்து அதை ஆசீர்வதித்து இது புதிய உடன்படிக்கையாகிய என்னுடைய இரத்தமாய் இருக்கிறது என்று கூறுகிறார் (லூக்கா 22:20).  அப்படியானால் புதிய ஏற்பாட்டை ஏற்படுத்தியவர் கர்த்தராகிய இயேசு கிறிஸ்து.  எதன் மூலமாக ஏற்படுத்துகிறார், அவருடைய இரத்தத்தின் மூலமாக ஏற்படுத்துகிறார்.

மோசே, எலியா, இயேசு கிறிஸ்து:

            தாகோர் என்று ஒரு மலை கலிலேயாவில் உள்ள நாசரேத்திற்கு அருகாமையில் இருக்கிறது.  இஸ்ரவேல் பள்ளத்தாக்கில் இருந்து பார்த்தால் அந்த மலை மிகவும் அழகாக காட்சியளிக்கும்.  இயேசு கிறிஸ்து ஒரு முறை பேதுரு, யோவான், யாக்கோபை கூட்டிக்கொண்டு அந்த மலையில் ஏறினார்.  மலையில் ஏறிய கலைப்பில் சீஷர்கள் மூவரும் தூங்கிவிட்டார்கள்.  திடீர் என்று எழுந்து பார்த்தால் மூன்று நபர்கள் மறுரூபமானதை பார்க்கிறார்கள்.  ஒருவர் ஆண்டவராகிய இயேசு கிறிஸ்து. மற்ற இருவர் மோசேயும், எலியாவும்.  மற்ற இருவர் யார்? என்று பேதுருவும், யோவானும், யாக்கோபும் இயேசு கிறிஸ்துவிடம் சென்று கேட்கவில்லை.  அப்படியானால் வந்தவர்கள் இருவரும் மோசேயும், எலியாவுமே என்று ஆண்டவர் சீஷர்களுக்கு வெளிப்படுத்தியிருக்க வேண்டும்.    எனவே தான் ஆண்டவரே, உமக்கு ஒரு கூடாரமும், மோசேக்கு ஒரு கூடாரமும், எலியாவுக்கு ஒரு கூடாரமும் போட்டு நாம் இங்கேயே தங்கிவிடுவோம் என்று பேதுரு சொல்லுகிறார். (மத்தேயு 17:4), (மாற்கு 9:5), (லூக்கா 9:33).

            மத்தேயு 17-ம் அதிகாரம் மிகவும் முக்கியமான அதிகாரம் ஆகும்.  ஏனென்றால், ஆதியாகமம் முதல் உபாகமம் வரை உள்ள நியாயப்பிரமாண புத்தகத்தின் பிரதிநிதியாகிய மோசேயும், யோசுவா முதல் மல்கியா வரை உள்ள தீர்க்கதரிசன புத்தகங்களின் பிரதிநிதியாகிய எலியாவும் அதாவது முழு பழைய ஏற்பாடும், புதிய ஏற்பாட்டின் பிரதிநிதியாகிய ஆண்டவராகிய இயேசு கிறிஸ்துவை பார்க்க வருகிறார்கள்.  முதல் முறையாக ஆதியாகமம் முதல் வெளிப்படுத்தல் வரை உள்ள அறுபத்து ஆறு புத்தகத்தின் பிரதிநிதிகள் ஒரே இடத்தில் சந்திக்கிறார்கள்.  எனவே தான் நாம் இங்கே தங்கிவிடுவோம் என்று பேதுரு கூறுகிறார்.  அதற்கு மறுமொழியாக இயேசு கிறிஸ்து ஒன்றும் சொல்லவில்லை.  வானத்திலிருந்து ஒரு சத்தம் உண்டாகி, பிதாவானவர் மூன்று விதமான காரியங்களை பேசுகிறார்.  1. இவர் என் நேசக்குமாரன். 2. இவரில் பிரியமாய் இருக்கிறேன்.  3. இவருக்குக் கீழ்ப்படியுங்கள். (மத்தேயு 17:5), (மாற்கு 9:7), (லூக்கா 9:35).

            இவருக்குக் கீழ்ப்படியுங்கள் என்பதன் அர்த்தம் என்ன?  இந்த நிகழ்வு நடக்கும் நேரத்தில் புதிய ஏற்பாட்டில் ஒரு புத்தகமும் எழுதுப்படவில்லை.  புதிய ஏற்பாட்டின் இருபத்து ஏழு (27) புத்தகங்களில் முதலில் எழுதப்பட்ட புத்தகம் மாற்கு புத்தகம்.  எழுதியவர் மாற்கு.  மாற்கு என்பவர் பர்னபாவின் அக்கா மகன்.  பேதுருவின் ஊழியத்தில் இரட்சிக்கப்பட்டவர்.  புதிய ஏற்பாட்டின் ஒரு புத்தகமும் எழுதப்பட்டிராத அந்த நேரத்தில் பிதாவானவர் பழைய ஏற்பாட்டையும், புதிய ஏற்பாட்டையும் ஒரே இடத்தில் சங்கமிக்கும்படி செய்தார்.  இங்கு சொல்லப்பட்டிருக்கும் அவருக்குக் கீழ்ப்படியுங்கள் என்பது எதைக் குறிக்கிறது என்றால், அந்த வேதாகமத்திற்கு கீழ்ப்படியுங்கள் என்பதைக் குறிக்கிறது.

            ஆதியிலே வார்த்தை இருந்தது.  அந்த வார்த்தை தேவனிடத்தில் இருந்தது.  அந்த வார்த்தை தேவனாய் இருந்தது.  அந்த வார்த்தையானவர் இயேசு கிறிஸ்து.   இயேசுவாகிய வார்த்தை வெளிப்படுத்தப்பட்ட அறுபத்து ஆறு புத்தகங்கள் கொண்ட வார்த்தையாகிய பரிசுத்த வேதாகமத்தை மூன்று பிரதிநிதிகளை ஒன்றாக்குவதன் மூலம் நிரூபணமாகியது.  முழு பரிசுத்த வேதாகமமும் சந்தித்த அந்த இடம் (மலை) மிகவும் முக்கியமானதாகும்.

 

தானியேலின் தீர்க்கதரிசனம்:

            தானியேல் 9:24-ல் வாசிக்கிறோம் ஆண்டவர் யூதர்களுக்கு எழுபது (70) வராங்களைக் கொடுக்கிறார்.  இவற்றில் அறுபத்து ஒன்பது (69) வாரங்கள் நடக்கும்.   அதாவது எருசலேம் அலங்கம்  கட்டப்பட கட்டளை பிரப்பிக்கப்படும் நாள் முதல் மேசியா சங்கரிக்கப்படும் நாள் வரைக்கும் அறுபத்து ஒன்பது வாரங்கள் (69).  எருசலேம் அலங்கம் கட்டப்பட நெகேமியாவிற்கு கட்டளை கொடுக்கப்பட்டது.  அந்த நாள் முதல் மேசியா சங்கரிக்கப்படும் நாள் வரைக்கும அறுபத்து ஒன்பது (69) வாரங்கள்.  அப்படியானல் ஒரு வாரத்திற்கு ஏழு (7) நாட்கள், அதாவது 69X7 மொத்தம் நானூற்று என்பத்து மூன்று (483) வரும்.  அதாவது, நெகேமியாவிற்கு எருசலேம் அலங்கத்தை கட்ட கட்டளை கொடுக்கப்பட்ட நாள் முதல் இயேசு கிறிஸ்து சிலுவையில் அரையப்பட்ட நாள் வரை சரியாக நானூற்று என்பது மூன்று (483) வருஷம்.  ஒவ்வொரு நாளும் ஒரு வருஷத்தைக் குறிக்கும்.  இயேசு கிறிஸ்து சிலுவையில் அறையப்பட்ட நாள் முதல் யூதர்களுடைய காலம் நின்றுபோய் விட்டது.  அந்த கடைசி ஏழ வருஷம் அதாவது எழுபதாவது வாரம் நடைபெறவில்லை.  அதற்கு முன்பாக ஒரு இடைவெளி வந்துவிட்டது.  அந்த காலம் புறஜாதியாருடைய காலம்.  கிருபையின் காலம்.  கிருபை என்றால், நாம் இஸ்ரவேலர்கள் அல்ல, இஸ்ரவேலர்கள் மாத்திரமே ஆண்டவருடைய சொந்தப்பிள்ளைகள்.  ஆண்டவருடைய பிள்ளைகளாவதற்கு தகுதியில்லாத நம்மை ஆண்டவர் அவருடைய இரத்தத்தினால் தகுதிபடுத்தி, புறஜாதியாகிய நம்மையும் அவருடைய சொந்தபிள்ளையாக மாற்றிவிட்டார்.  சபையை ஆண்டவர் எடுத்துக்கொள்ளும் நாளில் கிருபையின் காலம் முடிவடையும்.  சபை எடுத்துக்கொள்ளப்பட்ட பின்பு, யூதர்களுக்கான கடைசி ஏழு வருடம் துவங்குகிறது.

ஆட்டுக்குட்டியானவரின் திருமணம்:

            இயேசு கிறிஸ்து முப்பத்து மூன்று வயதில் மரித்து உயிர்த்தெழுந்தார்.  உயிர்த்தெழுந்த நாள் முதல் இயேசு கிறிஸ்து முப்பது மூன்று  வயது நிறைந்தவர்.  அதன் பின்பு அவர் மனுஷனாகிய இயேசு அல்ல.  கடவுளாகிய இயேசு.  அதன்பின்பு அவருடைய வயது அதிகரிப்பதில்லை.  கிருபையின் காலம், புறஜாதிகளின் காலம் முடிவடைந்து சபை எடுத்துக்கொள்ளப்பட்ட பின்பு பூமியிலே யூதர்களுடைய காலம் துவங்குகிறது.  அன்றிலிருந்து பரலோகத்திலும் யூதர்களுடைய காலம் ஆரம்பமாகியது.

சபையை விலைகொடுத்து மீட்டுக்கொண்டவர் கடவுளாகிய இயேசு அல்ல, மனுஷனாகிய இயேசு.  சபையை மணவாட்டி என்று அழைப்பதும் கடவுளாகிய இயேசு அல்ல, மனுஷனாகிய இயேசு.

            யூதக்கலாச்சாரத்தின் படி ஒரு ஆண் நாற்பது வயது நிறைவடைந்த பின்பே திருமணம் செய்ய முடியும்.  முப்பத்து மூன்று வயதில் உயிர்த்தெழுந்த இயேசு கிறிஸ்து கடவுளாகிய இயேசுவாக வெளிப்படுத்தல் மூன்றாம் அதிகாரம் வரை காணப்படுகிறார்.  வெளிப்படுத்தல் நான்காம் அதிகாரத்தில் அவர் மனுஷனாகிய இயேசுவாக  (ஆட்டுக்குட்டியானவராக) காணப்படுகிறார் (வெளிப்படுத்தல் 5:6).  வெளிப்படுத்தல் 19-ம் அதிகாரத்தில் நாற்பது வயது நிறைந்த மனுஷனாகிய இயேசு சபையை திருணம் செய்கிறார்.

மோசேயும், எலியாவும் மீண்டும் வருவார்கள்:

            கிருபையின் காலம் முடிவடைந்த பிறகு யூதர்களின் காலம் துவங்குவதால், அதாவது பழைய ஏற்பாட்டுக் காலம் துவங்குவதால் பழைய ஏற்பாட்டு பிரதிநிதியாகிய மோசேயும், எலியாவும் வெளிப்படுத்தல் 11-ம் அதிகாரத்தில் பூமிக்கு இரங்கி வருகிறார்கள்.  வெளிப்படுத்தல் 11-ல் வரும் இரண்டு நபர்கள் மோசேயும், எலியாவுமே என்று வேதத்தில் குறிப்பிடவில்லை.  யூதர்களுடைய பழைய ஏற்பாட்டுக் காலம் துவங்குவதால், வருகிறவர்கள் பழைய ஏற்பாட்டின் பிரதிநிதியாகிய மோசேயும், எலியாவும் தான் என்று நாம் புரிந்துகொள்ள வேண்டும்.

            எபிரெயர் 9:27-ல் சொல்லப்பட்டபடி ”மனுஷன் ஒரே தரம் மறிப்பதும், பின்பு நியாயத்தீர்ப்பு அடைவதும் அவனுக்கு நியமிக்கப்பட்டிருக்கிறது”.  மோசேயும் எலியாவும் வந்த மூன்றறை ஆண்டுகளுக்கு பிறகு அந்திக்கிறிஸ்துவால் கொலை செய்யப்படுகிறார்கள்.  மூன்று நாளைக்குப் பின்பு உயிரடைந்து மீண்டும் பரலோகம் செல்வார்கள்.

சிலர் ஏனோக்கும் எலியாவும் தான் மரிப்பதற்காக வருகிறார்கள் என்று நினைக்கிறார்கள்.  அப்படியானால் இரகசிய வருகையில் மரிக்காமல் எடுத்துக்கொள்ளப்படுகிறவர்கள் (1 தெசலோனிக்குயர் 4:17) எங்கு போவார்கள்.  அவர்கள் மரிக்காமல் அல்லவா எடுத்துக்கொள்ளப்படுவார்கள்.  எனவே, இது முற்றிலும் தவறானது கருத்தாகும்.  வருகிறவர்கள் மோசேயும், எலியாவுமே.

மோசே, எலியா அடையாளம்:

            வருகிறவர்கள் மோசேயும் எலியாவும் தான் என்பதற்கு இரண்டு நபர்களுக்கும் இரண்டு விதமான அடையாளங்களை வேதம் தருகிறது.

எலியா

            எவனாவது அவர்களை தீண்டினால் அவர்கள் வாயிலிருந்து அக்கினி வரும் என்று எழுதப்பட்டுள்ளது.  முழு வேதத்திலும் அக்கினியை இறக்கிய ஒரே தீர்க்கதரிசி எலியா மட்டுமே.  கர்மேல் மலையில் அக்கினியை இறக்கினார்.

            மழை வராதபடி வானத்தை அடைப்பதற்கு அவர்களுக்கு அதிகாரம் உண்டு என்றும் எழுதப்பட்டுள்ளது.  முழு வேதத்திலும் மழை வராமல் மூன்றரை ஆண்டுகள் வானத்தை அடைத்து வைத்த ஒரே தீர்க்கதசிரி எலியா மட்டுமே.  (1 இராஜாக்கள் 17 அதி)

மோசே

            தண்ணீரை இரத்தமாக மாற்றவும், சகலவிதமான வாதைகளாலும் வாதிக்கவும் அவர்களுகக்கு அதிகாரம் உண்டு என்று எழுதப்பட்டுள்ளது.  தண்ணீரை இரத்தமாக்கிய ஒரே நபர், 10 வாதைகளைத் எகிப்தியருக்கு தந்த ஒரே நபர் இந்த மோசே மட்டுமே.

மோசே, எலியா ஒவ்வொருவருக்கும் இரண்டு விதமான அடையாளங்களை நாம் வெளிப்படுத்தல் 11-ம் அதிகாரத்தில் வாசிக்கிறோம்.  எனவே, வருகிறவர்கள் மோசேயும் எலியாவுமே என்பது தெளிவாகிறது.

மோசே, எலியா, இயேசு

            இவர்களிடம் காணப்பட்ட ஒற்றுமைகள்.  இந்த முழு வேதத்திலும் எத்தனையோ பேர் ஜெபித்திருக்கிறார்கள்.  ஆனால் இந்த மூவர் மட்டுமே நாற்பது நாள் ஜெபித்தவர்கள்.  இந்த மூன்று நபர்களும் ஒரே இடத்தில் தான் உபவாசம் இருந்தார்கள்.  மோசே சீனாய் வனாந்தரத்தில் உபவாசம் இருந்தார்.  நெகேவ் பாலைவனத்தில் படுத்திருந்த எலியாவை தேவதூதன் இரண்டாவது முறை சாப்பிடக் கொடுத்து, கர்த்தருடைய பர்வதத்திற்கு போகச் சொன்னார்.  கர்த்தருடைய பர்வதம் என்பது சீனாய் வனாந்தரம்.  இங்கு தான் எலியா உபவாசம் இருந்தார்.  இயேசு கிறிஸ்துவும் உபவாசிப்பதற்காக ஆவியானவராலே வனாந்தரத்திற்கு கொண்டுபோகப்பட்டார்.  எந்த வனாந்தரம் என்றால் சீனாய் வனாந்தரம். எரிகோ, பெயர்செபா அதோடு வேதக்காலத்தில் இஸ்ரவேலர்களின் எல்லை முடிவடைகிறது.  அதற்கு கீழ் இருக்கும் வனாந்தரத்தின் பெயர் யூதேயா வனாந்தரம்.  அதற்கு கீழாக இருக்கிற வனாந்தரத்தின் பெயர் பாராக் வனாந்தரம்.  (இந்த வனாந்தரத்திற்கு தான் ஆகாரும், இஸ்மவேலும் அனுப்பிவிடப்பட்டார்கள்).  அதைக் கடந்த கீழே வந்தால் நெகேவ் வனாந்தரம்.  அதை தாண்டி கீழே வந்தால், அரபிக் பாலைவனம், அதைத் தொடர்ந்து இருப்பது சீனாய் அல்லது மீதியான் வனாந்தரம்.  பாலைவனம், வனாந்தரம் இவை இரண்டும் ஒரே பொருளையே குறிக்கிறது.

இத்தனை வனாந்தரங்கள் இருந்தபோதிலும் இயேசு கிறிஸ்து கொண்டுபோகப்பட்டது சீனாய் வனாந்தரம் என்று எப்படி கணிக்கமுடிகிறது என்றால், நம்முடைய வேதத்தில் வெறுமனே வனாந்தரம் என்று வந்தால் அது சீனாய் வனாந்தரத்தையே குறிக்கிறது.  மற்ற வனாந்தரங்களைக் குறிக்கும்போது அந்த வனாந்தரத்தின் பெயரோடு குறிப்பிடப்படும்.  ஆனால் சீனாய் வனாந்தரிரத்தைக் குறிக்கும்போது வெறுமனே வனாந்திரம் என்றே குறிப்பிடப்பட்டிருக்கும். அதேபோல வேதத்தில் கடல் என்று வந்தால் அது மத்திய தரைக்கடலைக் குறிக்கும்.  மற்ற கடலைக் குறிக்கும்போது அதின் பெயரும் சேர்த்து குறிப்பிடப்பட்டிருக்கும்.  உப்புக்கடல், கலிலேயா கடல் போன்ற கடல்களைக் குறிக்க அதின் பெயரையும் சேர்த்து குறிப்பிட்டிருக்கும். நதி என்ற வந்தால் அது ஐபிராத்து நதியை மட்டுமே குறிக்கும்.  மற்ற நதிகளைக் குறிக்க நிதியின் பெயரும் சேர்ந்து இடம்பெற்றிருக்கும்.  கிசோன் நிதி, கேபார் நதி, நயில் நதி என அந்த அந்த நதி பெயரோடு குறிப்பிட்டிருக்கும். 

 

பழைய ஏற்பாடு:

            பழைய ஏற்பாட்டில் உள்ள நெபீன் என்று சொல்லப்படுகிற தீர்க்கதரிசன புத்தகங்களை (யோசுவா முதல் மல்கியா வரை) மேலும் இரண்டு பிரிவுகளாக யூதர்கள் பிரித்தார்கள்.   யோசுவா முதல் உன்னதப்பாட்டு வரை உள்ள முதல் பதினேழு புத்தகங்களை கெட்டூபீன் என்று அழைத்தார்கள்.  கெட்டூபீன் என்றால் எழுத்துக்கள் என்று பொருள்.  ஏசாயா முதல் மல்கியா வரை உள்ள மற்ற பதினேழு புத்தகங்களை தீர்க்கதரிசன புத்தகங்கள் அல்லது நெபீன் என்று அழைத்தார்கள்.

            யூதர்கள் பழைய ஏற்பாட்டை டோரா, நெபீன் என்று இரண்டாக பிரித்தார்கள்.  பின்காலத்தில் டோரா, நெபீன், கெட்ரூபீன் என்று மூன்றாக பரித்தார்கள்.

எ.கா: இஸ்ரவேல் என்பது தாவீதின் காலத்தில் முழு இஸ்ரவேல் தேசத்தையும் குறித்தது, ஆனால் சாலொமோன் ராஜாவிற்குப் பின்பு இஸ்ரவேல் என்றால் வடக்கு ராஜ்யத்தை மட்டுமே குறிக்கும்.  அதைப்போலவே கெட்டூபீன் என்பது எந்த இடத்தில் வருகிறது என்பதைப் பொறுத்து அதன் அர்த்தம் மாறுபடும்.

 

புறஜாதிகளின் பழைய ஏற்பாட்டு பிரிவு:

            புறஜாதிகள் பழைய ஏற்பாட்டை ஐந்து பிரிவுகளாக பிரித்தார்கள்.

1. டோரா (அல்லது) நியாயப்பிரமாணம்

            ஆதியாகமம், யாத்திராகமம், லேவியராகமம், எண்ணாகமம், உபாகமம். மொத்தம் ஐந்து புத்தகங்கள்.

 2. சரித்திர புத்தகங்கள்

            யோசுவா, நியாயாதிபதிகள், ரூத், 1 சாமுவேல், 2 சாமுவேல், 1 இராஜாக்கள், 2 இராஜாக்கள், 1 நாளாகமம், 2 நாளாகமம், எஸ்றா, நெகேமியா, எஸ்தர். சரித்திர புத்தகங்கள் மொத்தம் பனிரெண்டு.

3. கவிதைப் புத்தகங்கள் (அ) செய்யுல் புத்தகங்கள்

            யோசு, சங்கீதம், நீதிமொழிகள், பிரசங்கி, உன்னதப்பாட்டு.  மொத்தம் ஐந்து புத்தகங்கள்.

4. பெரிய தீர்க்கதரிசிகள்

            ஏசாயா, எரேமியா, புலம்பல், எசேக்கியேல், தானியேல்.  மொத்தம் ஐந்து புத்தகங்கள்.

5. சிறிய தீர்க்கதரிசிகள்

            ஓசியா, யோவேல், ஆமோஸ், ஒபதியா, யோனா, மீகா, நாகூம், ஆபகூக், செப்பனியா, ஆகாய், சகரியா, மல்கியா.  மொத்தம் பனிரெண்டு புத்தகங்கள்.

 

நியாயப்பிரமாணத்தை எழுதியவர் யார்?

            நியாயப்பிரமாண புத்தகம் முழுவதையும் மோசே தான் எழுதியுள்ளார்.  சிலர் மோசே எழுதவில்லை என்று நம்புகிறார்கள்.  JEDP என்று ஒரு தியரியை உருவாக்கினார்கள்.  இவர்கள் சொல்லுகிறார்கள் மோசே ஐந்து ஆகமங்களை எழுதவில்லை.   ஏனென்றால்,

            பழைய ஏற்பாட்டை மூலமொழியாகிய எபிரெய மொழியில் பார்க்கும்போது, அதில் சில குறைபாடுகளை சொல்லுகிறார்கள்.  இந்த குறைபாட்டை மூலபாஷையாகிய எபிரெயு மொழியில் படித்தால் மட்டுமே, எபிரெயு மொழியில் புலமை பெற்றவர்கள் படித்தால் மட்டுமே கண்டடிய முடியும்.

            ஆதியாகமம் முதலாம் அதிகாரம் முதல் யாத்திராகமம் பத்தொன்பதாம் (19) அதிகாரம் வரை வாசித்துப் பார்த்தால், அதில் எழுதப்பட்டுள்ள ஒவ்வொரு வார்த்தைகளும் எபிரெயு மொழியில் அதிஉயர்ரக வார்த்தைகள்.  மிகச்சிறந்த எழுத்து நடையைக் கொண்டு எழுதப்பட்டுள்ளது. (எ.கா) ஆதியிலே தேவன் வானத்தையும் பூமியையும் சிருஷ்டித்தார்.  பூமியானது ஒழுங்கின்மையும் வெறுமையுமாய் இருந்தது என்று அதிஉயர்ரக எபிரெயு மொழியில் எழுதப்பட்டுள்ளது.

முதல் அறுபத்து ஒன்பது (69) அதிகாரங்கள் அதிஉயர்ரக எபிரெயு மொழியில் பயன்படுத்தப்பட்டுள்ள நிலையில், யாத்திராகமம் இருபதாம் (20) அதிகாரம் முதல் நாற்பதாம் (40) அதிகாரம் வரை வாசித்தால், அது ஒரு குழந்தைத்தனமான எபிரெயு மொழியில் எழுதப்பட்டுள்ளது. (எ.கா) ஒரு நாள் மோசே நின்று கொண்டிருந்தானாம், அப்பொழுது சாமி மலைக்கு எறிவாடா என்று கூப்பிட்டதாம்.  உடனே மோசே மலைக்கு ஏறிச் சென்றானாம்.  இதுபோன்ற ஒரு குழந்தைத்தனமாக எபிரெயு மொழி பயன்படுத்தப்பட்டுள்ளது.

லேவியராகமம் ஒரு பிராமணன் தமிழை எழுதினால் எந்த நடையில் இருக்குமோ அந்த நடையில் எழுதப்பட்டுள்ளது. (எ.கா) மோசே ஆத்துக்கு வரச்சே, மோசேயோட ஆத்துக்காரி இந்த ஒரு எழுத்து நடையில் லேவியராகமம் எழுதப்பட்டுள்ளது

உபாகமம் ஒரு பிரசங்க முறைப்படி எழுதப்பட்டுள்ளது.  நாம் பேசுவதை அப்படியே எழுதிவிட முடியாது.  பேச்சு வார்த்தையை எழுதும்போது அதற்கான நயத்துடன் அதை எழுதவேண்டும்.  ஆனால், உபாகமம் ஒரு பேச்சு நடையில் எழுதப்பட்டுள்ளது.  (எ.கா) ஆகாவே, அப்படியானால்….

ஒவ்வொரு புத்தகமும் ஒவ்வொரு எழுத்து நடையை கொண்டிருப்பதால், இந்த JEDP தியரியை உருவாக்கியவர்கள் ஐந்து ஆகமங்களை எழுதியவர் மேசே அல்ல, வேறு வேறு நபர்கள் எழுதியிருப்பார்கள் என்று நம்புகிறார்கள்.

J - ஜெகோவா

E - எலோகிம்

P – ஆசாரியர்கள்

D – உபாகமம் (Deco..)

மோசேயின் புத்தகத்தில் ஏன் இந்த வேறுபாடு

            ஆண்டவர் புதிய ஒரு இனத்தை உருவாக்க வேண்டும் என்று நினைத்தார்.  அதற்காக தெரிந்துகொண்ட ஒரு நபர் தான் ஆபிரகாம்.  ஆபிரகாம் ஒரு பாபிலோனியன்.  ஆண்டவர் ஆபிரகாமை சொந்த இடத்திலிருந்து பிரித்தெடுத்து துரத்தி அடிக்கிறார்.  ஆரான், சீகேம், பெத்தேல், நெகீம், எகிப்து இப்படி பல இடங்களுக்கு விரட்டி அடித்தார்.  ஆபிரகாம் ஒரு இடத்தில் நிரந்தரமாக இல்லாமல் அங்கும், இங்கும் அழைந்து திரிந்துகொண்டிருந்தார்.

            ஆண்டவர் ஆபிரகாமை எழுபத்து ஐந்து (75) வயதில் அழைத்தார்.  ஏன் ஆண்டவர் ஆபிரகாமிற்கு நூறு (100) வயது வரை குழந்தையை கொடுக்கவில்லை.  ஏனென்றால், ஆண்டவர் ஆபிரகாமின் மூலமாக ஒரு புதிய கலாச்சாரத்தை உருவாக்கி விரும்பினார்.  ஒரு புதிய கலாச்சாரத்தை உருவாக்க வேண்டுமானால், பழைய கலாச்சாரத்தை ஒழிக்க வேண்டும்.  ஆபிரகாம் பாபிலோனை விட்டு வெளியே வந்திருந்தாலும், ஆபிரகாமிற்குள்ளாக பாபிலோனியக் கலாச்சாரம் இருந்திருக்கும்.  ஆண்டவர் ஆபிரகாமை அழைத்ததும் ஒரு குமாரனைக் கொடுத்திருந்தால், ஆபிரகாம் அவனை பாபிலோனிய முறைப்படியே வளர்த்திருப்பார்.  எனவே தான் ஆண்டவர் ஆபிரகாமை இருபத்து ஐந்து (25) ஆண்டுகள் அங்கும், இங்கும் அலையப்பண்ணி, கலாச்சாரம் இல்லாத ஒரு மனிதனாக மாற்றினார்.  இருபத்து ஐந்து (25) ஆண்டுகளாக பல தேசங்களுக்குச் சுற்றித்திரிந்ததால் ஆபிரகாமிடம் இருந்த பாபிலோனிய காலச்சாரம் மாறியிருக்கும்.  பல தேசங்களுக்கு அலைந்து திரிந்ததால் ஆபிரகாமிற்கென்று ஒரு கலாச்சாரம் இருந்திருக்காது.  ஒரு கலாச்சாரத்தின் படி வாழ்ந்த மனிதனைக் கொண்டு மற்றும் ஒரு கலாச்சாரத்தை உருவாக்குவது மிகவும் கடினமாக காரியம்.  ஆனால், ஆபிரகாமைப் போல பல ஆண்டுகளாக, பல தேசங்களுக்கு சுற்றித்திரிந்த ஒரு மனிதனைக்  கொண்டு ஒரு புதிய கலாச்சாரத்தை உருவாக்குவது மிகவும் எளிது.  எனவே ஆண்டவர் இருபத்து ஐந்து (25) வருடங்களுக்கு பிறகு ஆபிரகாமிற்கு ஒரு குமாரனைக் கொடுத்து, அவனை இப்படி தான் வளர்க்க வேண்டும்,  இன்ன இன்ன பிரகாரம்வே செய்ய வேண்டும் என்று ஒரு புதிய கலாச்சாரத்தைக் கற்றுக்கொடுக்கிறார்.  ஆபிரகாம் பலதேசங்களுக்கு சுற்றித்திரிந்ததால் அவனுக்கு அநேக மொழிகள் தெரியும், ஆனால் எந்த ஒரு மொழியும் முழுமையாக தெரியாது.  இந்த நிலையில் தான் ஆண்டவர் ஆபிரகாமிற்கு ஒரு புதிய மொழியைக் கொடுக்கின்றார்.  அந்த மொழிதான் எபிரெய மொழி.  அப்படியானால் உலகில் பிறந்த முதல் எபிரெய குழந்தை ஈசாக்கு.

            ஆண்டவர் எதை எப்படி செய்ய வேண்டும் என்று ஆபிரகாமிற்கும் சாராளுக்கும் தெளிவாக கற்றுக்கொடுத்தார்.   பிள்ளையை எப்படி வளர்க்க வேண்டும், பிள்ளைக்கு எப்படி உடுப்பு உடுத்த வேண்டும், எப்படிப்பட்ட உணவுகளைக் கொடுக்க வேண்டும், எப்படி பால்கொடுக்க வேண்டும், ஒரு நாளில் எத்தனை முறை பால் கொடுக்க வேண்டும், துணிமாற்றுவது எப்படி செய்ய வேண்டும் இவை எல்லாவற்றையும் ஆண்டவர் ஆபிரகாமிற்கும் சாராளுக்கும் கற்றுக்கொடுத்தார்.  இப்படி ஆண்டவர் கற்றுத்தந்த எந்த ஒரு கலாச்சாரமும் வேதாகமத்தில் இல்லை.  ஏனென்றால், அவைகள் தேவனுடைய வார்த்தைகள் அல்ல.  இவை அனைத்தும் யூதக்கலாச்சாரப் புத்தகமாகிய டல்மோட், மிஸ்னா, கெமாஹா போன்ற புத்தகங்களில் எழுதப்பட்டுள்ளது.  இந்த மூன்று புத்தகங்களும் தேவனுடைய வார்த்தைகள் அல்ல, எனவே இவைகள் வேதத்தில் எழுதப்படவில்லை.  நாம் யூதக்கலாச்சாரத்தை பற்றி அறிந்துகொள்ள வேண்டுமானால், இந்த மூன்று புத்தகங்களையும் படிக்க வேண்டும்.  ஒரு ஆண்மகன் நாற்பது (40) வயதில் தான் திருமணம் செய்ய வேண்டும் என்பது இந்த கலாச்சாரப் புத்தகத்தில் தான் எழுதப்பட்டுள்ளது.  இது ஈசாக்கிடமிருந்துது துவங்கியது.  (ஆதியாகமம் 25.20)

            ஆபிரகாம் மூலமாக எபிரெய மொழி உருவானது.  ஆனால் எழுத்து வடிவில் உருவாகவில்லை.  ஆபிரகாம், ஈசாக்கு, யாக்கோபு, யோசேப்பின் காலத்தில் எழுபது (70) போர் எகிப்து புறப்படுகிறார்கள்.  அங்கு நானூற்று முப்பது (430) வருஷம் ஜீவிக்கிறார்கள்.  பின்பு மோசேயின் தலைமையில் புறப்பட்டு கானான் தேசத்திற்கு வருகிறார்கள்.  இந்த நாள் வரையிலும் எபிரெய மொழி எழுத்துவடிவம் பெறவில்லை.  மோசே எகிப்திய அரண்மனையில் நாற்பது (40) ஆண்டுகள் வாழ்ந்தார், எனவே அவருக்கு எகிப்திய மொழி தெரியும்.   மீதியான் தேசத்தில் நாற்பது (40) ஆண்டுகள் வாழ்ந்தார், எனவே மீதியானிய மொழி தெரியும்.

            இஸ்ரவேலர்கள் எகிப்தில் நானூற்று முப்பது (430) வருஷம் இருந்தார்கள்.  ஆனால் ஆண்டவர் ஆபிரகாமிற்கு சொல்லும்போது நானூறு வருஷம் என்று சொல்லுகிறார்.  (ஆதியாகமம் 15.13).  ஆண்டவர் தோராய ஒரு மதிப்பாக சொல்லுகிறார்.  இதை வைத்துக்கொண்டு நாம் வேதத்தின் கருத்து முரண்பாடானது என்று சொல்ல முடியாது.

எ.கா. நாலுபேர் பார்த்தால் சிறிக்கப்போகிறார்கள் என்று நாம் சொல்வதுண்டு.  அப்படியானால் சரியாக நாலுபேர் நின்று சிரிக்க மாட்டார்கள்.  அது ஒரு தோராய மதிப்பு அதைப்போன்று தான் ஆண்டவர் ஆபிரகாமிற்கு சொல்லுகிறார்.

            நானூற்று முப்பது (430) வருஷத்தில் எத்தனை வருஷங்கள் இஸ்ரவேலர்கள் அடிமையாக இருந்தார்கள் என்று எழுதப்படவில்லை.  யோசேப்பின் காலத்தில் எகிப்திற்கு வந்த இஸ்ரவேலர்கள் 430 வருஷம் அங்கே இருந்தார்கள்.  ஆனால் நானூற்று முப்பது (430) வருஷமும் அடிமையாக இல்லை.   இஸ்ரவேலர்கள் எகிப்திற்கு வந்தபோது யோசேப்பு தான் பிரதம்ம மந்திரி.  எனவே வந்த எழுபது பேருக்கும் ராஜா மரியாதை கிடைத்திருக்கும்.  யோசேப்பை அறியாத ராஜா (யாத்திராகமம் 1:8) வந்தபோது, என்று வேதத்தில் நாம் வாசிக்கிறோம்.  இதன் பின்பு தான் இஸ்ரவேலர்கள் அடிமையாக்கப்படுகிறார்கள்.

            எகிப்து என்பது ஒரு அறிவு பெருத்த ராஜ்யம்.  உலகில் முதல் முதலாக சத்திர சிகிச்சை (அறுவை சிகிச்சை) செய்தவர்கள் எகிப்தியர்கள்.  மரித்தவர்களின் உடல் கெட்டுப்போகாமல் இருப்பதற்காக, பதப்படுத்தும் முறையை கண்டுபிடித்தவர்கள் எகிப்தியர்கள். மிரம்பிடுகளை கட்டியதும் எகிப்தியர்கள்.  நயில் நதியை வளமான நதியாக மாற்றி, அதில் கப்பல் போக்குவரத்து செய்தவர்கள் இந்த எகிப்தியர்கள்.

            எகிப்தியர்கள் பிரமிடுகளில் எழுதப்பட்டுள்ள கல்வெட்டுகளை ஆராய்ந்தால், இஸ்ரவேலர்கள் எகிப்தில் ஏறக்குறைய முன்னூறு ஆண்டுகள் அடிமைகளாக இருந்தார்கள் என்பதை கண்டறிய முடிகிறது.

நூற்று முப்பது வருஷங்கள் இஸ்ரவேலர்கள் எகிப்தில் சுகமாய் இருந்தார்கள்.  அந்த நேரத்தில் அவர்கள் எகிப்திய மொழியை கற்றுக்கொள்ள துவங்கினார்கள்.  எகிப்திய தெய்வங்களை வணங்க துவங்கினார்கள்.  பின்நாட்களில் யோசேப்பை அறியாத ராஜா வந்தபோது, அவன் இஸ்ரவேல் ஜனங்களிடம் இரண்டு காரியங்களை கவனிக்கிறார்.  இந்த எபிரெய ஜனங்கள் எங்களை விட எண்ணிக்கையில் அதிகரித்துக்கொண்டிருக்கிறார்கள்.  இந்த எபிரெய ஜனங்கள் எங்களை விட பலசாலிகளாக இருக்கிறார்கள். (யாத்திராகமம் 1:9)  இதை பார்த்த ராஜா உடனே அவர்களை அடிமைப்படுத்துகிறார்.

அடிமைப்படுத்தப்பட்ட பிறகு அவர்கள் வசிக்கும் இடத்தை விட்டு நிம்சிஸ் என்ற பகுதிக்கு தள்ளப்பட்டார்கள்.  அந்தப் பகுதிக்கு அரசு சலுகைகள் எதையும் கொடுக்கமாட்டார்கள்.  வீடுகளுக்கு பதிலாக கூடாரங்களில் வாழத்துவங்கினார்கள்.  எபிரெய பிள்ளைகள் இனி கல்வி கற்க முடியாது என்ற சட்டம் இயற்றப்படுகிறது.  எனவே, மோசேயின் காலத்தில் ஒரு எபிரெயனுக்கும் எழுதப்படிக்க தெரியாது.  ஒருவருக்கும் சொந்தமாக வீடு இருந்ததில்லை.  இரவும் பகலும் அடிமையாக வேலை செய்துகொண்டிருந்தார்கள்.

கடவுள் தனக்காக பிரித்தெடுத்த சந்ததியை ஏன் அடிமையாக வைக்க வேண்டும்.  ஏன் என்றால் அவர்கள் எகிப்திய தேசத்தில் சுகபோகமாக வாழ்ந்திருப்பார்களானால் அவர்கள் எகிப்திய கலாச்சாரத்தைப் பின்பற்ற துவங்கியிருப்பார்கள்.  எபிரெய கலாச்சாரத்தையும், ஆண்டவரையும் மறந்துவிடுவார்கள்.  எனவே, ஆண்டவர் எகிப்திய ராஜாவை பயன்படுத்தி எபிரெய ஜனங்களை அடிமைப்படுத்துகிறார்கள். நானூற்று முப்பது (430) வருஷத்திற்கு பின்பு மோசேயின் தலைமையில் ஜனங்கள் எகிப்தைவிட்டு புறப்பட்டனர்.

            இஸ்ரவேல் ஜனங்கள் எகிப்திலிருந்து புறப்பட்டு கானான் தேசத்திற்கு வரும் வழியில் ஆண்டவர் அவர்களுக்கு பத்து கட்டளைகளை கொடுக்கிறார்.  மோசேயை சீனாய் மலைக்கு அருகில் உள்ள ஓரேப் மலையுச்சிக்கு அழைத்து, ஆண்டவர் தான் கைப்பட பத்து கட்டளைகளை இரண்டு கற்பலகைகளில் எழுதி மோசேயிடம் கொடுக்கிறார்.  ஆண்டவர் அந்த பத்து கட்டளைகளை எந்த மொழியில் எழுதியிருப்பார்.  எபிரெயு மொழியில் தான் எழுதினார்.  அப்படியானால், முதல் முறையாக எபிரெயு மொழியை எழுதியது யார்? ஆண்டவர் தான், தன் கைப்பட எபிரெயு மொழியில் பத்து கட்டளைகளை எழுதினார்.  அந்த பத்துக் கட்டளைகளையும் மோசே வாங்கிக்கொண்டு மலையிலிருந்து கீழே இரங்கி வந்தார்.  ஜனங்கள் அனைவரும் பொன் கன்றுக்குட்டியை உருவாக்கி அதை வணங்கிக் கொண்டிருந்தார்கள்.  அதைப் பார்த்த மோசே கோபம் கொண்டு ஆண்டவர் எழுதிக்கொடுத்த இரண்டு பலகைகளையும் மலையின் அடியில் எரிந்து உடைத்துப்போட்டான்.  (யாத்திராகமம் 32)

            பின்பு ஆண்டவர் மறுபடியும் மோசேயை மலைக்கு அலைத்து பத்து கட்டளைகளை மோசேயையே எழுதச் சொல்லுகிறார்.  மனிதர்களில் முதல் முறையாக எபிரெயு மொழி எழுதியது மோசே.  என்ன எழுதினார் என்றால் பத்து கட்டளைகளை எழுதினார்.  மோசே முதன் முறையாக எபிரெயு மொழி எழுதுகிறார், எனவே தான் ஒரு குழந்தைத்தனமான மொழி நடையில் யாத்திராகமம் இருபதாம் அதிகாரம் இடம்பெற்றிருக்கும்.  மோசே முதலில் யாத்திராகமம் இருபது (20) முதல் நாற்பது (40) அதிகாரங்களை எழுதிய பின்பு ஆண்டவருடைய வெளிப்பாட்டின் படி ஆதியாகமம் ஒன்றாம் அதிகாரம் முதல் யாத்திராகமம் பன்தொன்பதானம் (19) அதிகாரம் வரை எழுதுகிறார்.   எனவே தான் யாத்திராகமம் இருபது (20) முதல் நாற்பது (40) அதிகாரங்கள் ஒரு குழந்தைத்தனமான மொழிநடையிலும், ஆதியாகமம் ஒன்று முதல் யாத்திராகமம் பத்தொன்பதாம் (19) அதிகாரம் வரை நல்ல உயர்தர மொழியிலும் எழுதப்பட்டுள்ளது.  பின்பு லேவியராகமத்தை ஆசாரியர்களுக்கு ஏற்ற ஒரு மொழி நடையில் எழுதுகிறார்.